Iman inu

The following rendering uses Unicode Tifinagh-Characters. If they are not properly displayed, you can download and install GNU Unifont.

ⵉⵎⴰⵏ ⵉⵏⵓ

ⵔⵉⵖ ⴽⵎ ⴰⴷ ⵜⴳⵜ
ⵍⵃⴱⴰⵇ ⵖ ⵜⵓⵔⵜⵉⵜ ⵏ ⴳⴰⵔ ⵜⵓⴳⴰ
ⵉⴼⴽⴰⵏ ⵜⵓⵊⵊⵓⵜⵉⵏ ⵖ ⴳⴰⵔ ⵜⴰⵎⵓⵙⵜ
ⵔⵉⵖ ⴽⵎ ⴰⴷ ⵜⴳⵜ
ⴰⴼⵓⵙ ⵏ ⵓⵣⵔⴳ
ⵉⵜⵜⵎⵓⵙⵙⵓⵏ ⵉⴼⴽ ⵜⴰⵢⴰⴼⵓⵜ
ⵎⵇⵇⴰⵔ ⴷ ⵓⵔ ⵉⵖⵍⵉ ⵓⵙⴳⴳⵯⴰⵙ
ⵔⵉⵖ ⴽⵎ ⴰⴷ ⵜⴳⵜ
ⵉⵍⵙ ⵏ ⵜⴰⴽⴰⵜ
ⵍⵍⵉ ⵔⴰⴷ ⵉⵊⴷⵔ ⴰⵟⵟⴰⵏ ⵏ ⵡⵓⵍ ⵉⵏⵓ
ⵔⵉⵖ ⴽⵎ ⴰⴷ ⵜⴳⵜ
ⵜⵉⵎⵇⵇⴰ ⵏ ⵓⵏⵥⴰⵔ
ⵍⵍⵉ ⵔⴰⴷ ⵉⵙⵙⵓ ⵜⵉⵡⴰⵔⴳⵉⵡⵉⵏ ⵇⵇⵓⵔⵏⵉⵏ ⵖ ⵓⴳⵯ ⵏⵙ ⵉⵏⵓ
ⵔⵉⵖ ⴽⵎ ⴰⴷ ⵜⴳⵜ
ⵉⵎⴰⵏ ⵏ ⴱⴰⴱⴰ ⵎ
ⴰⵙⴰⴼⵓ ⵏ ⵎⴰ ⵎ
ⵜⵓⵎⵔⵜ ⵏ ⵜⴰⵡⵊⴰ.


Agadir, ass n 27-12-2009

Illi

Ha d afus nm

Ha d afus inu

Ijdr s tlbbav zgh mzziy

Ha d alln nm

Ha d alln inu

Ktarnt s ids n tmttant zgh asiru ¹
Ha d ils nm
Ha d ils inu
Iqqur gh udfl zgh tinml
Ha d ixf inu

Ha d ixf nm

Tssutl as tmlli

Mqqar ibdd hlli

Ha d tudrt nm

Ha d tudrt inu

Tummazt n umlal gh tmda n tillas

Illi

Had kmmi
Had nkki

Ad ur tmunt d ulli

1 Illi gh ittlal warraw v udis n tmghart (utérus)

Abu waskiwn ay afalkay

Abu waskiwn ay afalkay

Ma f ar sul tcttat?
Ma f ar sul tssat ?
Yak rad gn ttmi i tudrt nk!
Yak nnan ass n tmttant nk!
Max aylligh tn tujjit
Ad ak gn iskraf
Issudm k wwad
Tawk ttad tadu nk

Abu waskiwn ay afalkay

Ini asn:

Is rad iyi bdda tqqrsm!

Is rad iyi bdda tsdullum!

Abu waskiwn ay afalkay

Gg zund nkk

Tsitti tn iskraf

Tasit asafu

Tinit asn:

Amazigh ad iyi t innan!
Amazigh ad iyi t innan!
Tankra¹ zund tin bu ilmawn gh igr uma3i²
Tarat amzruy nk s waskiwn nk
A bu waskiwn ay afalkay
Ad ak ur gin lhnna ula fkan ak afar nna
Azmz n tssumga³ ur sul illa

Tadrfit ! Tadrfit !

Abu waskiwn ay afalkay.

Agadir ass n 26-12- 2009

1Tagrawla (Révolution, ttawra)

2Yan udwwar gh dcayra tasga n ugadir ittwayssan s bu ilmawn.

3ad ig ufgan ismg i wayyad- esclavage

Mra...

Mra ka gigh

Yat tnfult¹ n ddular
Nghd tin luru
Ula gigh amaziv

Mra gan i wawal inu atig

Mra skarv azal v yid

Rad sisi sawaln

Rad iyi ttghawaln
Rad iyi gn gh ulawn
Rad iyi sakan amadal
Mmrn igh d darsn uckigh
Nnuvjfn igh asn ddigh



Mra ka gigh

Yat tanfult n ddular

Nghd tin lluru
Ula gigh amazigh.



Ayt baha 05- 03- 2009

1 Tawriqt (feuille).